ट्रेल दौडमा चीनका यानको वर्चस्व, पूर्णले आफ्नै रेकर्ड तोडे

चीनका यान लङफेईले फेरी अर्को किर्तिमान कायम गरेका छन् । नर्थ फेस ५० दौड ४ घण्टा ४५ मिनेट र ५ सेकेन्डमा पूरा गर्दै यानले उक्त किर्तिमान बनाएका हुन् । ताई मेई तुकमा बनाएको अघिल्लो किर्तिमानभन्दा उनले ४० मिनेट कम समयमै दौड पूरा गरेका हुन् ।

यानले दुई महिनाभन्दा कम समयमै तेश्रो पटक हङकङ ट्रेल दौडको किर्तिमान बनाएका हुन् । उनले अक्टोबरको अन्त्यतिर  लान्ताउ ७० र नोभेम्बरमा ट्रान्सएनटीमा यस अघिका किर्तिमान तोडेका थिए । फेरी एक पटक, “खासै मेहनत नगरी” उनले दौड जितेका छन् ।

“यान लङफेई अद्भूत छन् । उनी एक असाधारण खेलाडी हुन्,” नर्थ फेसको प्रायोजन रहेका खेलाडी भ्लाद इक्सेलले भने । उनले उक्त दौड ५ घण्टा २६ मिनेट ५५ सेकेन्डमा दौड पूरा गरेर दोश्रो उपाधी हात पारेका छन् । “मलाई शुरूदेखि नै दोश्रो स्थानका लागि दौडिरहेको छु भन्ने थाहा थियो ।”

यान पहिलो पटक नर्थ फेस ५० ट्रेलमा सहभागी भएका हुन् । मनोरम दृश्यहरूको आनन्द लिदैं र हाईकर्सहरूलाई अभिवादन गर्दै उनले दौडको आनन्द लिएको यानले बताए ।

“म यी दौडहरूलाई अभ्यासका रूपमा लिन्छु,” यानले बताए । उनले १०० को साटो ५० ट्रेलमा प्रतिस्पर्धा गर्ने निर्णय गरे किनभने उनी शेन्जेन ईन्टरनेशनल म्याराथनमा आईतबार दौडदैछन् । “हङकङका ट्रेलहरू मैले अहिलेसम्म देखेकामध्ये सबैभन्दा सुन्दर छन् । म यस अघि पनि लान्ताउ र हङकङ ट्रेलमा सहभागी भएको छु तर यो कोर्समा मेरो पहिलो अनुभव हो । मैले एकदमै आनन्द लिएँ ।”

उनी आगामी महिना भिब्राम हङकङ १०० अल्ट्रामा फर्किने योजनामा छन् । उक्त दौडमा उनले आफ्नो सीमा जाँच्ने वाचा गरेका छन् ।

“मैले त्यो दौड कठिन हुने अपेक्षा गरेको छु र त्यसका लागि सक्दो मेहनत गर्नेछु,” ३३ वर्षिय यानले बताए । उनलाई सोलोमनले प्रायोजन गरेको छ ।

ल्योङ यिङ–स्वेतको पनि उस्तै कथा छ । उनले महिलातर्फको ५० ट्रेल ६ घण्टा २६ मिनेट २ मिलिसेकेन्डमा पूरा गरि विजयी भएकी छिन् । उनले पनि शनिबारको दौडलाई “अभ्यास मानेको” बताईन् । हङकङका पूर्व धावक ल्योङ हाल मिजुनोमा कार्यरत छिन् । हङकङको राष्ट्रिय टोलीमा फेरी फर्किन सक्छिन् वा सक्दिनन् भन्ने निर्धारण गर्न उनले डिसेम्बर ३० मा हुने कम्पनीकै दौड प्रतियोगिता मिजुनो हङकङ हाफ म्याराथन च्याम्पियनसिप्समा प्रतिस्पर्धा गर्नेछिन् ।

“धावकको रुपमा हङकङको प्रतिनिधित्व गर्ने यो मेरो अन्तिम अवसर हो, त्यसलै आजको यो दौडलाई मैले अभ्यासको रूपमा प्रयोग गरें । म त्यो दौडमा मेरो भएभरको शक्ति लगाउनेछु ।”

जोईन्ट डाईनामिक्सका धावक रायन व्हिलनले पुरूषतर्फको दौडमा ५ घण्टा ३७ मिनेट ५६ सेकेन्ड समय लगाएर तेश्रो स्थान हासिल गरेका छन् । महिलातर्फको दौड ६ घण्टा ४७ मिनेट ३४ सेकेन्डमा पूरा गरेर एन्जेलिका हान दोश्रो स्थानमा आईन् । व्हिलनकै समूहबाट दौडमा भाग लिएकी एससीएमपीकी मेरी हुईले सञ्चारकर्मीहरूलाई गर्व गर्ने अवसर प्रदान गरेकी छिन् । उनले ६ घण्टा ५७ मिनेट २१ सेकेन्डमा दौड पूरा गरेर तेश्रो स्थान प्राप्त गरेकी छिन् ।

नेपालका पूर्ण तामाङले फिलिपिन्सका जोन “स्टिङरे” ओनिफालाई नर्थफेस १०० अभूतपूर्व अन्तिम प्रतिस्पर्धामा साँघुरो अन्तरले पराजित गरेका छन् । सन् २०१३ मा उक्त कोर्समा किर्तिमान बनाएका तामाङले यसपाली आफ्नै रेकर्ड तोडेका छन् । उनले उक्त दौड ११ घण्टा ५९ मिनेट ५७ सेकेन्डमा पूरा गरेका छन् । ओनिफाले दौड पूरा गर्न १२ घण्टा १७ मिनेट ३४ सेकेन्ड लगाए ।

“यो गज्जबको दौड थियो र विजयी हुँदा म धेरै खुशी छु,” तामाङले भने । उनी नेपाली सेनामा दौडका प्रशिक्षक हुन् । “हतार भएकाले एउटा चेकप्वाईन्टमा म हराएँ । त्यसले मेरो पाँच मिनेट समय खेर गयो । तै पनि जोन उत्कृष्ट धावक हुन् र उनले नै मलाई उत्कृष्ट प्रदर्शन गर्न हौस्याए ।”

अघिल्लो महिना भएको अक्सफाम ट्रेलवकरमा तामाङको समूह दोश्रो स्थानमा आएको थियो । उनी अब विश्रामका लागि तयार छन् । उनी केही महिनामै हङकङ आएर दौडमा भाग लिने योजनामा छन् तर कहिले भन्ने निश्चित छैन ।

नर्थफेसले प्रायोजन गरेका स्टिङरे पूर्व माझी हुन् । फिलिपिनो सेनामा भर्ती हुने थुप्रै असफल प्रयासपछि उनी सन् २०१६ देखि पूर्णकालीन ट्रेलधावक बनेका हुन् ।  उनले यसलाई “हालसम्मकै उत्कृष्ट प्रदर्शन” बताउँदै यो वर्ष सफल रहेको बताए ।

“मैले तामाङसँगको प्रतिस्पर्धाको निकै आनन्द लिएँ,” ओनिफाले भने । उनले दिवंगत आमाका लागि दौडने गरेको बताए । “मेरो उमेर २७ वर्ष मात्रै पुग्दैछ र म अझ बलियो बन्दैछु ।”

अष्ट्रियाका माईकल स्कोबेर्स्कीले १२ घण्टा ४० मिनेट ३६ सेकेन्ड समय लगाएर तेश्रो स्थान प्राप्त गरेका छन् । उनी पनि यो वर्ष आयोजित अक्सफाम ट्रेलवाकरका सहभागी हुन् ।