सार्वजनिक यातायातमा छुट
एससीएमपी
February 16, 2019
हङकङका यात्रुवर्गले आजदेखि सार्वजनिक यातायातमा तीन सय हङकङ डलरसम्म अनुदान पाउनेछन् ।
पब्लिक ट्रान्सपोर्ट सब्सिडी स्किम जनवरी १ देखि लागु गरिएको छ । कार्यकारी प्रमुख क्यारी लामले यात्रुलाई सुविधा दिन सन् २०१७ को नीति सम्बोधनमा योजनाबारे घोषणा गरेकी थिइन् ।
योजना अन्तर्गत‚ सार्वजनिक यातायातमा मासिक चार सय हङकङ डलरभन्दा धेरै खर्च गर्नेलाई २५ प्रतिशत अनुदान दिइनेछ । यस्तो अनुदान रकम बढीमा तीन सय हङकङ डलर हुनेछ । अनुदान दिएवापत सरकारले वार्षिक २ अर्ब ३० करोड हङकङ डलर आर्थिक भार बोक्नुपर्नेछ ।
जनवरीमा मात्रै‚ १८ करोड ६० लाख हङकङ डलर बराबरको अनुदान वितरण गरिएको छ । यसबाट सार्वजनिक यातायात प्रयोग गर्ने २३ लाख यात्रु लाभान्वित भएका छन् ।
योजनाका लागि आवेदन दिनुपर्छ ? उमेर वा आम्दानीको हदबन्दी छ कि ?
कुनै आवदेन वा अक्टोपस प्रि–रेजिष्ट्रेसन आवश्यक छैन । मासिक अनुदान हिसाब गर्दा अक्टोपस कार्डबाट भुक्तान गरिएको मासिक यातायात खर्च पनि स्वत: समावेश गरिनेछ ।
लाभान्वितका लागि उमेर वा आयस्तरको कुनै हदबन्दी छैन । सार्वजनिक यातायातको मासिक खर्च चार सय हङकङ डलर नाघेसम्म सबै यात्रु यो योजनाबाट लाभान्वित हुनेछन् । वृद्ध वा अपांगताजस्ता भाडा छुटजस्ता योजनाका लाभान्वितहरू पनि यसमा समावेश हुनेछन् ।
योजनामा कुन सार्वजनिक यातायात सेवा वा रूट समावेश गरिएका छन् ?
योजनामा यातायात विभागबाट अनुमति पाएका एमटिआर‚ फ्रान्चाइज्ड बस सेवा‚ ग्रिन मिनिबस‚ फेर्री‚ ट्राम‚ रेड मिनिबसका तोकिएका रूट‚ काइतो–बाहिरी द्विपवासीलाई सेवा दिने साना फेर्री‚ रेजिडेन्ट र कर्मचारीलाई सेवा दिने नन–फ्रान्चाइज्ड बस सेवा लगायत वृहत सार्वजनिक यातायात समावेश छन् ।
अनुदानप्राप्त रूटको पहिचानमा सहजिकरण गर्न‚ अक्टोपसका विज्ञापनभन्दा माथि वा कुनै प्रमाणित सवारी साधन वा जहाजमा योजनाको लोगो राखिनेछ ।
योजनामा समावेश नगरिएका कुनै सार्वजनिक यातायात खर्चहरू पनि छन् ?
तल उल्लेख गरिएका सार्वजनिक यातायात खर्च र यातायात टिकटहरू योजनामा समावेश गरिएका छैनन् ।
- नगदमा भुक्तान गरिएका भाडा
- ट्याक्सी भाडा
- एमटिआरको एकतर्फी यात्राको टिकक (एयरपोर्ट एक्सप्रेस लगायत)‚ हाइस्पिड रेल टिकट‚ इन्टरसिटी टिकट‚ त्यही दिन फर्किने एयरपोर्ट एक्सप्रेस टिकट‚ लगायत ट्राभल एजेन्टबाट खरिद गरिएका एयरपोर्ट एक्सप्रेस राउन्ड ट्रिप टिकट
- एकतर्फी एयरपोर्ट यात्राको बस टिकट
- पर्यटकका लागि बुझाइएको टिकट खर्च
- न्यु वर्ल्ड फर्स्ट बस सर्भिसेसको “रिक्सा साइटसिइङ बस” का लागि दिवा पास
- अस्थायी अक्टोपस कार्डबाट भुक्तान गरिएका भाडा
- फेर्रीमा साइकल‚ फ्राइट‚ सवारी साधन र घरपालुवा जनावर बोकेको भाडा
मासिक अनुदान कसरी हिसाब गरिन्छ ?
प्रत्येक अक्टोपसमा रेकर्ड गरिएका सार्वजनिक यातायात प्रयोग गर्दा भएका वास्तविक मासिक खर्चहरूको आधारमा प्रत्येक महिनाको अनुदान हिसाब गरिन्छ । सार्वजनिक यातायातमा चार सय हङकङ डलर खर्च गर्ने यात्रुलाई सरकारले २५ प्रतिशत अनुदान दिनेछ । यस्तो अनुदान अधिकतम तीन सय हङकङ डलरसम्म हुनेछ ।
उदाहरणका लागि‚ कुनै महिना एक हजार दुई सय हङकङ डलर खर्च गर्ने यात्रुले अनुदान वापत दुई सय हङकङ डलर पाउनेछ ।
अनुदान कसरी दाबी गर्ने ? यसको कुनै समयसीमा छ ?
प्रत्येक महिनाको १६ तारिख र त्यसपछि‚ यात्रुले अक्टोपस एपबाट अघिल्लो महिनाको अनुदान संकलन गर्न सक्नेछन् । अक्टोपस सर्भिस पोइन्ट‚ एमटिआर स्टेसन‚ लाइट रेल ग्राहक सेवा केन्द्र‚ तोकिएका फेर्री घाट र कुनै पनि सेभेन–इलेभेन‚ सर्कल के वा वेलकप सुपरमार्केट लगायत शहरका एक हजार आठ सयभन्दा धेरै संकलन केन्द्रबाट पनि अनुदान संकलन गर्न सकिनेछ ।
संकलन केन्द्र नीलो रंगका हुनेछन् । ती स्थानहरूमा भएका रिडरमा यात्रुवर्गले आफ्नो अक्टोपस कार्ड ट्याप गरे पुग्नेछ । अनुदान अक्टोपसमा जम्मा हुनेछ ।
प्रत्येक महिनाको अनुदान तीन महिनाभित्र संकलन गर्न सकिनेछ । त्यसपछि मासिक रकम झिक्न पाइने छैन ।
मासिक अनुदान रकमबारे कसरी जाँचबुझ गर्ने ?
यात्रुवर्गले सार्वजनिक यातायातको मासिक खर्च र उनीहरूको अक्टोपसको अनुदान रकम उल्लिखित माध्यमबाट जाँचबुझ गर्नसक्नेछन् : योजनाको वेबसाइछ‚ अक्टोपस एप वा हटलाइन २९६९ ५५०० ।
नगद वा अक्टोपसको भुक्तान सेवाबाहेकका माध्यमबाट तोकिएको यातायात टिकट शुल्कलाई कसरी समावेश गर्ने ?
एउटा महिनामा भएको कुल सार्वजनिक यातायात खर्च हिसाब गर्न प्रयोगकर्ताले त्यसलाई अक्टोपस रेकर्डसँग समावेश गर्न सक्नेछन् ।
फेर्री वा ट्रामका मासिक पास र एयरपोर्ट एक्सप्रेसको दुईतर्फी टिकट लगायत तोकिएको यातायात टिकटको आधारमा‚ यात्रुवर्गले टिकट खरिद गर्दा उनीहरूको अक्टोपस कार्ड बुझाएर अथवा एमटिआर स्टेसन‚ लाइट रेल ग्राहक सेवा केन्द्र र सम्बन्धित टिकट बिक्री गर्ने फेर्री घाटहरूमा भएका यातायात टिकटको सेल्फ–रेजिष्ट्रेसन पोइन्टमा टिकट दर्ता गराउन सक्नेछन् ।
यस्ता सेल्फ–रेजिष्ट्रेसन मेसिनहरू हरियो रंगका हुन्छन् । यात्रुवर्गले पहिले भौतिक टिकट र त्यसपछि अक्टोपस कार्डलाई रिडरमा ट्याप गर्नुपर्नेछ ।
–क्यानिक्स याउ
कमेन्ट गर्नुहोस्
