व्यापार वार्तामा महत्वपूर्ण प्रगति, थप परामर्शका लागि मार्ग प्रशस्त
रासस
February 2, 2019
वासिङ्टन, संयुक्त राज्य अमेरिका, माघ १९ माघ : वासिङ्टनमा भएको चीन र अमेरिका व्यापार वार्तामा महत्वपूर्ण प्रगति भएको वार्तामा सहभागी दुवै समूहले शनिबार जनाएका छन् ।
वार्ताका लागि वासिङ्टनमा रहेको चिनियाँ र अमेरिकी उच्च प्रतिनिधिमण्डलका सदस्यबीच चीन–अमेरिकाबीच देखिँदै आएको आर्थिक एवम् व्यापार विवाद समाधानका लागि बुधबार र बिहीबार छलफल भएको छ ।
चिनियाँ उप–प्रधानमन्त्री लिउ हेको नेतृत्वमा अमेरिका पुगेको वार्ता टोलीले समानान्तर अमेरिकी समूहसँग छलफल गरेपछि वातावरण सकारात्मक एवम् महत्वपूर्ण बनेको भन्दै अर्को चरणको लागि तालिका, कार्यदिशा र परामर्शका लागि दुवै समूहले सहमति जनाएका छन् ।
वार्ता सकारात्मक देखिएपछि बिहीबार नै अमेरिकी राष्ट्रपति डोनाल्ड ट्रम्पले चिनियाँ टोली नेता तथा उप–प्रधानमन्त्री लिउसँग ह्वाइट हाउसमा भेटवार्ता गरेका छन् ।
गत डिसेम्बरमा दुवै पक्षका राष्ट्रप्रमुखले अर्जेन्टिनाको राजधानी ब्युनर्स आयर्समा व्यापार विवाद समाधान गर्न सहमति गरेका थिए । कठिन प्रयासपछि त्यसलाई कार्यान्वयनमा लाने सहमति सम्भव भएको हो । अर्जेन्टिनामा दुई देशका नेताले दुवै पक्षले आगामी ९० दिनभित्र आपसी हितका लागि सम्झौता गरी व्यापार विवादलाई टुङ्ग्याउने सहमति गरे अनुरूप नै वार्ता अघि बढेको हो ।
महत्वपूर्ण प्रगति
दुई दिने वार्तामा अमेरिका र चीनका प्रतिनिधिले व्यापार सन्तुलन, प्रविधि हस्तान्तरण, बौद्धिक सम्पत्तिको अधिकारको सुरक्षा, गैर–करमुलक अवरोध, सेवा क्षेत्र, कृषि र कार्य सम्पादन व्यवस्थाका साथै चिनियाँ पक्षका विशेष चासोका केही विषयमा पनि छलफल गरिएको छ । अहिलेसम्मको अवस्थामा वार्ताले महत्वपूर्ण प्रगति हासिल गरेको,चिनियाँ प्रतिनिधिमण्डलले जनाएको छ ।
दुवै समूह दुईपक्षीय व्यापार थप सन्तुलित बनाउने उपाय अघि बढाउन सहमत भएका छन् ।
चिनियाँ पक्षले अमेरिकाबाट चीन आयात गर्ने कृषि, उर्जा, निर्माण तथा अन्य सेवामुलक सामानमा विस्तार गर्ने र यसले चिनियाँ जनताको उच्च तथा गुणस्तरीय आर्थिक विकासको मागलाई सम्बोधन गर्ने चीनको विश्वास छ ।
दुई पक्षबीच चिनियाँ तथा अमेरिकी विशेष चासोबारे छलफल भएको र यसले तिनलाई गम्भीररूपमा सम्बोधन गर्ने बताइएको छ ।
वार्ताका क्रममा दुवै पक्षले प्रभावकारी दुईपक्षीय संयन्त्र निर्माण गरेर परामर्शबाट भएका सहमति र निस्केका उपायलाई अनुगमन गर्न आवश्यक रहेकोमा जोड दिएका छन् । दुई शक्तिशाली अर्थतन्त्रका वार्ता टोलीबीच आगामी दिनमा निर्माण गरिने अनुगमन संयन्त्रको संरचना र आधारभूत कुराहरूमा सैद्धान्तिक सहमति बनेको छ । टोलीले समस्यालाई कम गर्न थप प्रयासलाई जारी राख्ने र अघि बढ्ने विषयमा सहमति जनाएको छ ।
अमेरिकी राष्ट्रपति ट्रम्पसँगको भेटमा राष्ट्रपति सी चिनफिङको सन्देश सुनाउँदै चीन–अमेरिकाबीचको सम्बन्ध जटिल मोडमा रहेको बताएको पनि चिनियाँ टोली नेताले सञ्चारकर्मीलाई जानकारी गराएका छन् ।
सन्देशमा सीले सहकार्य, समन्वय र स्थायित्वका लागि अर्जेन्टिना सहमतिमा चीन अडिग रहने जनाएको बताइएको थियो ।
“हामीले गरेका सहमति अनुसार दुवै पक्षका आर्थिक समूहले गहन छलफललाई अघि बढाएका छन् र यसबाट सकारात्मक प्रगति भइरहेको छ,” सीको सन्देशमा भनिएको छ ।
त्यसैगरी भेटमा ट्रम्पले पनि व्यापार विवादबारे महत्वपूर्ण प्रगति देखेको बताएका उप–प्रधानमन्त्री तथा वार्ता टोलीका नेता लिउले उल्लेख गरेका छन् । उनले अमेरिका–चीन सम्बन्ध सधै मजबुत रहने र दुई राष्ट्रप्रमुखको अगुवाईमा अघि बढ्ने बताए ।
“परामर्शलाई थप गति दिन तत्कालै अर्थात् मध्य फेब्रुवरीसम्म अमेरिकी व्यापार प्रतिनिधि रोवर्ट लाइथिजर र ट्रेजरी सेक्रेटरी स्टेभेन मनुचिनको नेतृत्वमा एउटा टोली चीन पठाइनेछ,” ट्रम्पले लिउलाई भने ।
चीनबारे प्रसिद्ध अमेरिकी विज्ञ रोबर्ट कुहनले सी र ट्रम्पले व्यापार विवाद मिलाउन सक्रिय नेतृत्व गरिरहेको बताए । “वार्ता साँच्चै दुवै पक्षको विजयको सहमतिका लागि अग्रसर बनेको र चीन, अमेरिका र समग्र विश्वका लागि महत्वपूर्ण उपलब्धीउन्मुख रहेको छ,” उनले सिन्ह्वा न्यूज एजेन्सीसँगको अन्तर्वार्तामा भने ।
कमेन्ट गर्नुहोस्
