डण्डीबियो प्रतियोगिता शुरू

रासस February 18, 2019

धादिङ, फागुन ५ : लोपोन्मुख अवस्थामा रहेको डण्डीबियो खेलको प्रतियोगिता धादिङबेसीमा पहिलो पटक आयोजना गरिएको छ ।

धादिङबेसीस्थित खुलामञ्चमा जिल्ला समन्वय समितिका प्रमुख जगन्नाथ नेपालले डण्डीले बियो हानेर आइतबार प्रतियोगिताको उद्घाटन गरे ।

डण्डीबियो संस्कृति जोगाउन तथा मौलिक खेलका रूपमा विकास गर्न डण्डीबियो सङ्घ र नेपाल स्काउट धादिङले संयुक्त रूपमा प्रतियोगिताको आयोजना गरेको हो ।  प्रतियोगितामा जिल्लाका ४१ विद्यालयले भाग लिएका छन् । प्रतियोगितामा पहिलो, दोस्रो र तेस्रो पुरस्कार वापत क्रमशः ५० हजार, ३० हजार,  २० हजार रूपैयाँ तथा सान्त्वना पुरस्कार स्वरूप १० हजार रूपैयाँ प्रदान गरिने नेपाल स्काउट धादिङका समन्वय आयुक्त शिव सापकोटाले जानकारी दिए ।