• घुम्नैपर्ने विश्वको १९औं उत्कृष्ट गन्तव्य काठमाडौं

  • काठमाडौं, चैत १३ : सन् २०१९ मा घुम्नैपर्ने विश्वका उत्कृष्ट २५ पर्यटकीय गन्तव्यको सूचीमाकाठमाडौं १९औं स्थानमा परेको छ ।

    घुमफिर र यात्राबारे यात्रीलाई विस्तृत विवरण प्रदान गर्ने सम्भवतः विश्वकै सबैभन्दा ठूलो अमेरिकी ‘ट्राभल साइट’ ट्रिप एडभाइजर डटकमले नेपालको राजधानीलाई यो वर्ष भ्रमण गर्नैपर्ने १९औं उत्कृष्ट पर्यटकीय गन्तव्यको सूचीमा समावेश गरेको हो ।

    ट्रिप एडभाइजर डटकमले काठमाडौं उपत्यका र आसपासका धार्मिक एवं ऐतिहासिकस्थल, वास्तुकलायुक्त अनुपम भवन, सङ्ग्रहालय, मठमन्दिर, चन्द्रागिरि, नगरकोट, शिवपुरी निकुञ्ज, विभिन्न उद्यानका साथै विश्व सम्पदा सूचीमा सूचीकृत स्थल हरेक यात्रीले हेर्नैपर्ने स्थानका रूपमा समावेश गरेको छ ।

    बौद्धनाथ, कपन गुम्बा, पशुपतिनाथ, केशर महलस्थित स्वप्न उद्यान, काठमाडौं, ललितपुर, भक्तपुर दरबार क्षेत्रका साथै ठमेललगायत स्थानलाई दर्शनीयस्थलका रुपमा उक्त साइटमा चित्रण गरिएको छ ।

    संयुक्त अधिराज्यको राजधानी लण्डनलाई पहिलो नम्बरमा समावेश गरिएको छ भने फ्रान्सको प्यारिस दोस्रो, इटलीको रोम तेस्रो, ग्रीसको क्रेट चौथो र इण्डोनेशियाको बाली पाँचौ नम्बरमा छन् । उक्त साइटले घुम्नैपर्ने शहरको सूचीमा दुबईलाई १०औं र संयुक्त राज्य अमेरिकाको महानगर न्यूयोर्कलाई १३औं स्थानमा राखेको छ ।

  • कमेन्ट गर्नुहोस्

  • Skip this ad