अमेरिका–चीन व्यापार वार्ता बेइजिङमा सुरू

रासस March 28, 2019

बेइजिङ, चैत १५ : संयुक्तराज्य अमेरिका र चीनबीच पछिल्लो चरणको व्यापार वार्ता बेइजिङमा बिहीबार सुरू हुँदैछ ।

विश्वका सर्वाधिक दुई ठूला अर्थतन्त्र‚ अमेरिका र चीनबीच उत्पन्न व्यापार गतिरोधलाई सहमतिमा टुङ्ग्याउने प्रयत्न स्वरूप केही महिनादेखि दुवै देशका वरिष्ठ अधिकारीहरूले वार्ता गरिरहेका छन् ।

अमेरिकी प्रमुख व्यापार प्रतिनिधि रोबर्ट लाइटिजर र अमेरिकी अर्थमन्त्री स्टिभेन मन्चिन बेइजिङ आइपुगेका छन् । अमेरिकी प्रधिनिधि मण्डलले चिनियाँ उपप्रधानमन्त्री एवं वरिष्ठ आर्थिक अधिकारी लिऊ हेसँग वार्ता गर्नेछ । चीनको जनकङ्ग्रेसले विदेशी लगानीको सुरक्षा सम्बन्धी कानुन पारित गरेपछि यो पहिलो वार्ता हुन लागेको हो ।

अमेरिकी राष्ट्रपति डोनाल्ड ट्रम्पले दुई मुलुकको व्यापार वार्ता चाँडै टुङ्गिने विश्वास व्यक्त गरेका छन् । चिनियाँ राष्ट्रपति सी चिनफिङसँग व्यापार वार्ताका विषयमा शिखर वार्ता गर्न प्रतिक्षारत रहेको ट्रम्पले बताएका छन् । वार्तामा केही मुलभूत विषयमा सहमति जुट्न बाँकी रहेको दुबै देशका प्रतिनिधिहरूले बताए पनि विस्तृत विवरण दिइएको छैन ।

बेइजिङमा हुने वार्तापछि वासिङ्टनमा पुनः वार्ता हुनेछ । लाइटीजरले यसैसाता भनेका छन्, “मैले आशा मारिसकेको छैन, वार्तामा ठोस सहमति नभए हामी दोस्रो योजनाका साथ अघि बढ्ने छौं ।”

अमेरिका र चीनले एकअर्काका करिब तीन खर्ब ६० अर्ब डलर बराबरका सामानमा कर वृद्धि गरेका छन् । यो कर वृद्धि हाल १० प्रतिशत छ । व्यापार वार्तामा सहमति नभए २५ प्रतिशत पुर्‍याइने अमेरिकी राष्ट्रपतिले चेतावनी दिएका छन् ।

अमेरिकाले खासगरी अमेरिकी प्रविधि चीनले चोरी गरेको, बौद्धिक सम्पत्तिको संरक्षण गर्न नसकेको, चिनियाँ बजार विदेशी कम्पनीहरूका लागि खुला नगरेको तथा चिनियाँ कम्पनीलाई सरकारले अनेक सहुलियत उपलब्ध गराएर विदेशी कम्पनीको प्रतिस्पर्धी क्षमता कमजोर बनाएको आरोप लगाएको छ ।

चीनको संरक्षणमुखी नीतिकै कारण अमेरिकासँग चीनको व्यापार घाटा छ खर्ब डलरभन्दा माथि पुगिसकेको अमेरिकी भनाई छ ।

तर चीनले अमेरिकी आरोपको खण्डन गरिरहेको छ । चीनले खुला विश्व व्यापारमा अमेरिकी नीति बाधक बन्न थालेको र अमेरिकी राष्ट्रपतिका नीतिहरु संरक्षणवादी शैलीका रहेको बताउँदै आएको छ । चीनले अमेरिकी नीतिको विरोध गर्दै विश्व व्यापार संगठनमा समेत उजूरी गरेको छ । अमेरिकी नीतिका कारण विश्व बजारमा नकारात्मक असर परेको तथा विश्वको आर्थिक वृद्धिमै सङ्कट उत्पन्न हुन थालेको चीनले बताएको छ ।