एकल साँझको नाममा दास प्रवृत्ति

सम्पादक January 29, 2019

भद्रकला एकल साँझ २०१९ मा गायक राजेशपायल राईको पहिलो प्रस्तुतिको बीचैमा आयोजक भद्रकला आङबुहाङ राईका श्रीमान् ओमप्रकाश राईले गीतको ट्रयाक रोकेको घटनाले चर्चा पायो । आयोजक र गायकबीच पर्दा पछाडि भलाकुसारी भएपछि उनले त्यही गीत दोहोर्याएर  गाएपछि भद्रकलाका गीतलगायत अन्य गीत प्रस्तुत गरे । कार्यक्रमका लागि यस्तै गीत गाउनु पर्छ भन्ने कुनै सम्झौता भएको पाइएन ।

प्राय एकल साँझ कि गायकको कि सङ्गीतकारको हुने गरेकोमा आजभोलि रचनाकारहरुले पनि एकल साँझको आयोजना गर्ने गरेको पाइएको छ । रचनाकारहरुले संग्रह निकाल्ने परिपाटि पनि शुरु भएको छ । हङकङका गीतकारहरुले पनि शुरुवातमा पुस्तिका प्रकाशित गरेका भए पनि आजकल सीडी तथा भीसीडी प्रकाशित हुन थालेका छन् । यस्तो पनि देखिएको छ कि कहिल्यै गीतलगायत कुनै रचना नगर्नेहरु पनि नेपाल गएर आउदा एकल गीतका सीडी र भीसीडी लिएर आउने र विक्री गर्ने गरेका छन् । पैसा दिएर नाम चलेका लेखकलाई लेख्न लगाइने गरिएको पनि चर्चा हुने गरेका छन् । एक पटक चर्चामा आएका ती साहित्यकार तथा गीतकारहरु अहिले गुमनाम भइरहेका घटनाले पनि ती चर्चामा सत्यता छ कि भन्ने देखिन्छ ।

भद्रकला आङबुहाङ पनि पैसाको माध्यमबाट चर्चामा आउने एक पात्रको रुपमा परिचित छन् । केही समयअघि नेपाली रुपैयाँ १२ करोड ४१ लाखको गाडि किनेको भनेर चर्चामा आएकी थिइन् । जब कि उक्त गाडिको मूल्य १ करोड ३० लाख रुपैयाँ मात्र रहेको छ ।

हङकङमा एकल साँझहरु पटक–पटक भएका छन् । दिनेश सुब्बा, अम्बर गुरुङलगायतका एकल साँझहरु भइसकेका छन् भने दुई हप्ताअघि मात्रै दीप श्रेष्ठको एकल साँझ भएको थियो । ती एकल साँझहरुमा सम्बन्धित श्रष्टाका बाहेकका रचनाहरु पनि प्रस्तुत भएका थिए ।

यस पृष्ठभूमिमा भद्रकला एकल साँझको घटनाले दास प्रवृत्तिको झल्को दिएको छ । रचनाकार भने पछि मालिक र गायक–गायिकाहरु दास हुन् भन्ने मान्यता स्थापित गर्न खोजिएको देखियो । पैसाले जोकोहीलाई दास बनाउन सकिन्छ भन्ने प्रयास गरिएको पाइयो । धन्य राजेशपायल राईले रोकिएको गीतलाई पुन प्रस्तुत गरेर दास प्रवृत्तिलाई चुनौति दिए ।
यस घटनाबाट पाठ सिकेर आउदा दिनमा श्रष्टाहरुले अर्को श्रष्टा वा चर्चा कमाउन चाहनेहरुबाट बच्न र बचाउन आवश्यक छ । होइन भने गीत–सङ्गीतको क्षेत्रमा दास प्रवृत्तिले जरो गाड्ने छ, चेतना भया !